Gob. Rafy, Nangidaulo ti Umuna a PGLU Flag Raising iti Bulan iti Hunio; Naintiempuan, Aktibo ken Naurnos a Panagtrabaho dagiti Empleyado, Naipaganetget
Ni: Charissa Marie E. Go, GPC-OPA-HRMU, Geraldine Salazar-Lucero, PIO | Ladawan ni: Christian Rebultan, ken ni Rizalde Buenaventura, PIO | Petsa: June 3, 2024
Napnuan iti inspirasyon iti umuna a Flag Raising Ceremony iti Provincial Government of La Union (PGLU) para iti agdama a bulan iti panangidaulo ni Gob. Raphaelle Veronica “Rafy” Ortega-David iti bigat ti Hunio 3, 2024 iti Provincial Capitol Grounds.
Numanpay maika-siam a bulanen iti panagsikogna ti Gobernador, personal daytoy nga immatendar iti nadakamat nga aktibidad kas panangipakita iti dedikasionna nga agserbi kas gobernador iti probinsia ti La Union.
Iti nagbalin a mensahe iti gobernador, impeksana a madama ti panagsagana iti PGLU para iti State of the Province Address, Pasko sa Kapitolyo 2024, ken iti Ayat Fest 2025: 175th La Union Founding Anniversary. Dagiti nabukel a komite para kadagiti nadakamat nga aktibidad ket nangrugin a nagtataripnong idi pay bulan iti Mayo tapno sigurado a nasayaat ti pannakaipatungpal iti tunggal aktibidad.
Inbunnanag met ni Gob. Rafy ti naimbag a damag maipanggep iti pakabuklan a Php 300 milyon grant iti PGLU babaen ti Philippine Rural Development Project. Kiniddaw ni Gob. Rafy dagiti opisina iti kapitolyo a suportaan ti proseso ken pannakaapruba dagiti proyekto a mapundoan babaen iti nadakamat a financial grant. Impaganetgetna a kasapulan ti panagtitinnulong dagiti opisina ti kapitolyo tapno mapapintas ken umado dagiti agnumar iti naipaay a pondo.
Kabayatanna, pinalagipan met iti gobernador dagiti empleyado maipanggep iti kinapateg iti naintiempuan, proaktibo, ken naurnos a panagtrabaho iti uneg iti PGLU. Inpaganetgetna a ti masursurot a sistema ket napateg para iti panangipaay iti nasayaat a serbisio kadagiti kaPROBINSYAnihan.
Nagleppas ti seremonia babaen iti panangawis iti gobernador iti pannakipag-La Union PROBINSYAnihan dagiti empleyado, a mangipakita iti sirmata ti Gobernador iti agkaykaysa ken napasnek a serbisyo iti Gobyerno Probinsyal.
Related Photos:
