Bakuna Kontra CoViD-19 Insayangkat iti BLDH
By: Leizlee Ann S. Espinueva, GPC-BLDH | Photos By: GPC-BLDH | Date: March 11, 2021
Awan panagdudua nga indaulo ni Dr. Mark Anthony S. Tomboc, Hepe ti Balaoan District Hospital ti pannakabakuna dagiti empleyado idi Marso 11, 2021. Kas pasilidad a natudingan a mangtaming kadagiti addaan sakit a CoViD-19, kanayon a nakarisgo ti biag dagiti Medical Frontliners isu't gapuna nga ginundawayanda ti libre a bakuna nga impaay ti gobierno. Adda 62 nga empleyado a nagboluntaryo nga agpabakuna ket maiyusat dayta iti duwa nga aldaw. Kinuna ni Dr. Tomboc, "Daytoyen ti nabayag nga ur-urayentayo a bakuna, apay nga itantantayo ti agpabakuna?"
Manamnama a daytoy a bakuna ti mangprotekta kadagiti manangaywan-salun-at bayat ti agtultuloy a panangtamingda kadagiti pasiente nga addaan sakit a CoViD-19. Dakkel a pribilehio daytoy a probision manipud iti Provincial ken National Government ket manamnama a maisayangkat to met ti panagbakuna kadagiti amin nga umili iti masangoanan tapno matungpal ti sirmata ti probinsia a "Healthy La Union, Happy La Union by 2025."
