Apo Santa Maria Mangibabaet Kadagiti Deboto iti La Union
By: Jan Armel P. Niro, La Union COMMunity Press Corps | Layout By: Rusty Ar Marc Reyes, PIO | Date: January 2025
Sinabat dagiti deboto a Katoliko iti baro a tawen 2025 iti umuna nga aldaw iti Enero babaen iti tallo a naisangsangayan a selebrasion iti Simbaan Katolika nga agtultuloy a mangpatpatalged iti pammatida ken ni Santa Maria. Nakipasetan dagiti deboto, nangnangruna dagiti taga-Luna, La Union, iti panangrambak iti Solemnidad ni Apo Santa Maria, Ina ti Dios; kasta met ti pananglukat iti Ordinary Jubilee Year A.D. 2025; ken iti maikadua nga Anibersario iti Deklarasion iti Diocesan Shrinehood iti Our Lady of Namacpacan.
Indauluan iti Obispo iti Diosesis iti San Fernando de La Union, Most Rev. Daniel O. Presto, D.D. ti misa a nanglukat iti baro a tawen. Impangrunana ti presensia iti namnama kadagiti addan pammati. Kinuna iti obispo iti sermonna, “This Jubilee year 2025…kinakailangang maglakad tayo and that manifests our being pilgrims dito sa lupang ibabaw…we journey not in isolation but in communion.”
Namaris ti pakasaritaan iti birhen ti Namacpacan. Maipalagip nga idi tawen 1871, ti imahe ni Immaculada Concepcion de Namacpacan wenno ni Apo Baket ket madama a maibibiahe sadiay Immaculate Conception Seminary iti Vigan, Ilocos Sur manipud iti Espanya ngem gapu iti bagyo, nagsanglad idiay Darigayos, Luna ti barko a nangilugananda iti imahe. Imbabada pay laeng daytoy iti kumbento tapno maibyahe babaen iti lugan ngem dimmagsen daytoy idi iyalisdan a nagresulta iti panagnaeden iti imahe iti sigud nga ili ti Namacpacan a maaw-awagan itan iti ili a Luna.
Sipud iti adu a panagmilagro ni Apo Baket, naaramid iti kanonikal a koronasionna idi maika-24 iti Nobiembre 1959 babaen iti special decree ni Pope St. John XXIII babaen ken ni Apostolic Nuncio to the Philippines Salvatore Siino. Iti imahe ni Our Lady of Namacpacan, nga agtaktakder iti 6 feet 4 inches (1.92 m), ket maysa kadagiti katayagan a Marian image iti Pilipinas ken mabigbigbig a patron iti sibubukel a Diosesis ti San Fernando de La Union.
Iti agdama, addan iti tallo a Marian Shrines ditoy La Union a pakairamanan iti Minor Basilica ken Diocesan Shrine ni Our Lady of Charity idiay Santa Monica Parish, Agoo, La Union; Diocesan Shrine ni Nuestra Señora Virgen Del Mar Cautiva idiay Holy Guardian Angels Parish, Santo Tomas, La Union; ken Diocesan Shrine ni Our Lady of Namacpacan iti Santa Catalina de Alexandria Parish, Luna, La Union.
Ti panagnaed dagiti imahe ti birhen Maria ket mangipakita daytoy ti nabuslon a bendision para iti probinsia ken mangpaneknek laeng daytoy ti nauneg a pammati dagiti taga La Union iti Ina iti Dios. Agserserbi iti debosion dagiti taga La Union ken Apo Santa Maria a mangited iti talingengen ken panangibabaet kadagiti karit iti biag.
