Pannakaisardeng ti Implementasion ti Baro nga Ortograpia ti Iloko nga Inpaulog ti KWF, Suportado ti La Union SP
[wp-svg-icons icon="user" wrap="span"] By: Jane Fernandez | [wp-svg-icons icon="camera" wrap="span"] By: Jane Fernandez | [wp-svg-icons icon="calendar" wrap="span"] Date: November 15, 2018
Nangngegan ti Sangguniang Panlalawigan ti La Union, babaen ti committee hearing idi Nobiembre 15, 2018, dagiti sentimiento dagiti naduma-duma a mannurat ti Iloko ken kameng dagiti lokal a pagiwarnakan, maipanggep ti implementasion ti baro nga ortograpia ti Iloko, nga inpaulog ti Komisyon ng Wikang Filipino (KWF).
Insayangkat ti Committee on Laws, Rules and Privileges ti Sangguniang Panlalawigan (SP) ti La Union ti maysa a committee hearing idi maika-15 ti Nobiembre, 2018, sadiay Cong. Eufranio “Franny” C. Eriguel Hall, SP Building, Siudad ti San Fernando, La Union, maipapan iti Baro nga Ortograpia ti Iloko nga inapulog ti Komisyong ng Wikang Filipino (KWF) nga Ortograpia ti Pagsasao nga Iloko (KWF).
Iti nasao a hearing, inlawlawag dagiti naawis a resource speakers a pakairamananda Ret. Judge Joven F. Costales, Eddy Almodovar, Errol Abrew, Djuna Alcantara ken Neo Valdez, ti epektona iti daytoy a panagpabaro ti ortograpia a inaramat ti KWF.
Nakipaset ti daytoy a tallaong dagiti kameng ti komite nga idauloan ni Bokal Reynaldo M. Mosuela, dagiti mannurat ti Iloko, ken dagiti nangibagi kadagiti lokal a pagiwaranakan.
“Dakkel nga insulto kadatayo nga Ilokano, no suruandatayo ti baro a tarabay ti bukodtayo a pagsasao,” inpeksa ni Costales. Iti panangipalawagna, kinunana a maipatulad iti Tagalog dagiti sao nga Ilokano babaen iti nasao nga Ortograpiya ta manayonan dagitoy ti letra “y.” Kaspangarigan, ti sao a “biag” (“buhay” ti Tagalog; “life” iti Ingles) ket manayonan ti “y” ken agbalin a “biyag.” Mabaliwanton ti paulo ti agdindinnamag nga epiko ti Iloko a “Biag ni Lam-ang” nga agbalin a “Biyag ni Lam-ang.”
Innayon met ni Valdez, Secretary General ti Gunglo dagiti Mannurat ti Iloko (GUNGLO) Pilipinas, nga awan napasamak a pannakainuman ti KWF dagiti mannurat ti Iloko kasanguanan nga impaulogna ti baro nga Ortograpiya. Naklaat lattan dagiti mannurat ta inpaaramatnan iti DepEd ti nasao a tarabay.
Kinuna met ni Dr. Elizabeth Calinawagan, retirado a propesor iti University of the Philippines, a dakkel a pakatikawan dagiti ubbing ti parnuayen ti baro a tarabay ta sabali ti panagsao ken panagsuratan ti Iloko kas maibatay kadagiti surat dagiti simmalip iti essay writing contest iti kalkalpas nga “Ayat Festival.”
Gapu kadagitoy a panangilawlawag, pinasingkedan ti SP ti suportana ti pannakatubeng ti implementasion ti baro a tarabay wenno ortograpia babaen ti dua a resolusion nga indatag ni Bokal Mosuela ken sangsangkamaysa nga inaprobaran dagiti kameng ti SP.
Ti umuna nga SP Resolution No. 150-2018, maiturung ti KWF ti pannakapasardeng ti implementasion ti baro nga ortograpia ken maangay ti konsultasion kadagiti amin a maseknan. Ti sumaruno, SP Resolution No. 151-2018 ket dumawdawat ti suporta dagiti diputado ti La Union, Hon. Pablo C. Ortega, Hon. Sandra Y. Eriguel ken Hon. Vini Nola A. Ortega para ti pannakateppel ti implementasion ti nasao a tarabay.
“Maawatanmi dagiti sasaaden dagiti mannurat ti Iloko. Ti lengguahe ket paset ti kultura ti maysa a lugar, ket no pati umno nga usarna daytoy ket idiktarda kadatayo, anian ti serbitayo nga Ilokano. Sibubukel ti suporta ti Sangguniang Panlalawigan maipanggep daytoy panangpasardeng ti implementasion daytoy baro nga ortograpia Iloko nga inpaulog ti KWF. Saan laeng a para kadatayo a mannurat ngem para kadagiti agtutubo, ti masakbayanda ken ti kulturatayo nga Ilokano daytoy nga addangtayo” kinuna ni Bokal Mosuela.
[Fancy_Facebook_Comments]
