150 Agtutubo manipud kadagiti GIDA Barangay, Nakipaset iti “Lakbay Aral” iti PGLU, LUPPO
By: Geraldine B. Salazar-Lucero, PIO | Photos By: Christian Rebultan, Vincent Aguinaldo and Rechelle Dulay, PIO | Date: May 4, 2024
Nasurok 150 nga agtutubo manipud kadagiti Geographically Isolated and Disadvantaged Area (GIDA) barangays iti La Union ti nakipaset iti “Lakbay Aral” a programa iti La Union Police Provincial Office (LUPPO) ken Provincial Government of La Union (PGLU), idi Mayo 4, 2024.
Panggep iti nadakamat nga aktibidad a mangted iti adal ken mangipaay iti liwliwa kadagiti agtutubo manipud kadagiti Barangay idiay San Gabriel, Sudipen, Santol, ken Bagulin.
Kas suporta ni Gov. Raphaelle Veronica “Rafy” Ortega-David kadagiti agtutubo, nabukel ti "Lakbay Aral" babaen ti panagisponsor ti PGLU.
Nagpasiar dagiti agtutubo iti Bahay na Bato idiay Luna, La Union kasaruno iti panagturongda idiay LUPPO headquarters idiay Camp Diego Silang ken Bureau of Fire Protection (BFP) iti siudad ti San Fernando. Naragsak a naimatangan dagiti ubbing dagiti nagduduma a uniformed personnel ken ti aktwal a fire prevention drill.
Nagturongda met idiay La Union Provincial Jail, nga inistemar dagiti Person Deprived of Liberty; ken Provincial Capitol a nakasurwanda kadagiti pakasaritaan iti probinsia ti La Union.
Ti Lakbay Aral ket mangipakpakita iti La Union PROBINSYANihan iti LUPPO, BFP ken dagiti dadduma pay nga ahensiya a katulungan iti PGLU a mangipapaay iti suporta tapno masigurado a dagiti amin nga ubbing iti probinsia ket maaddaan iti gundaway a mapadur-as ti adal ken abilidadda.
Related Photos:
