𝗣𝗔𝗡𝗔𝗡𝗚𝗣𝗔𝗣𝗜𝗚𝗦𝗔 𝗜𝗧𝗜 𝗟𝗘𝗡𝗚𝗚𝗨𝗔𝗛𝗘 𝗡𝗚𝗔 𝗜𝗟𝗢𝗞𝗢, 𝗡𝗔𝗜𝗞𝗞𝗔𝗡 𝗜𝗧𝗜 𝗜𝗠𝗣𝗢𝗥𝗧𝗔𝗡𝗦𝗜𝗔 𝗜𝗧𝗜 𝗠𝗔𝗜𝗞𝗔𝗗𝗨𝗔 𝗔 𝗦𝗘𝗥𝗬𝗘 𝗜𝗧𝗜 ‘𝗕𝗨𝗟𝗡𝗢𝗚' 𝗧𝗜 𝗣𝗚𝗟𝗨

By: Joy Ann Gurtiza, GPC-LUPTO | Photos By: Jestoni “Tonet” Gaerlan, LUPTO | Date: October 11-12, 2022

---

Nanayonan pay ti bilang dagiti nakipaset iti panagadal iti lengguahe nga Iloko ditoy Probinsia kalpasan ti pannakaiganuat iti maikadua a serye iti Bulnog: Iloko Learning Series (Basic Iloko Language Proficiency) idi Oktubre 11-12, 2022 iti Don Mariano Marcos Memorial State University (DMMMSU) – Mid La Union Campus Main Library iti Siudad ti San Fernando.

Ti nadakamat nga aktibidad ket inisiatibo ti Probinsial a Gobierno ti La Union (PGLU) nga idadauluan ni Gob. Raphaelle Veronica “Rafy” Ortega-David ken ti partnership support ti DMMMSU ken ti Gunglo dagiti Mannurat nga Ilokano (GUMIL) ti La Union – San Fernando City.

Iloko a balikas ti ‘BULNOG’ a ti kayatna a sawen ket kinaekselente wenno naisangsangayan unay. Kas kairusrusat a programa ti PGLU, panggep ti Bulnog ti agpatanor kadagiti Iloko communicators iti agduduma a plataporma a kas iti print ken broadcast media, agraman ti social media. Panggep pay daytoy nga aktibidad a maikkan iti importansia ti tarigagay ti PGLU a maisaknap a nasayaat iti kaipapanan ti pinandayna idi 2012 nga Iloko Code of La Union.

Kaaduanna nga immay a kas estudiante ti Bulnog ket pakaibilangan dagiti empleado iti LGU. Karaman met kadagiti immatendar dagiti department heads ti DMMMSU manipud kadagiti tallo a campus-na iti La Union.

Nairugi daytoy libre a Bulnog ti PGLU idi Oktubre 4 ken naituloy idi Oktubre 11 ken 12. Dagiti nagsagannad a nagsarita ket isuda Neyo Mario E. Valdez, Northern Luzon Committee on Literature and Arts (NCCA) ken ni Dr. Junley L. Lazaga, propesor ti UP Baguio Campus.

Trinatar ni Valdez ti "Akem ti salaysay iti pannakaidokumentario dagiti pangkultura ken pangturismo a programa" idinto a pinaaweng met ni Lazaga ti "Ti daniw kas literary tool iti panagdur-as ti arte ken kultura iti La Union."

Dakkel a nakasubokan dagiti nagadal iti Bulnog dagiti writeshop a naaramid kalpasan dagiti lektiur. Ken dakkel met a nakabang-aranda ti yaawatda amin iti sertipiko ken token of appreciation iti malem ti Oktubre 12 a pangrikep ti Bulnog Serye 1.

Inpanamnama iti PGLU ti agtultuloy a pannakikolaborasionna iti DMMMSU ken GUMIL kasta met dagiti dadduma pay a nagkaadu nga stakeholders ken sektor ditoy probinsia iti panangdayaw ken panangipangruna ti importansia ti pannakaitandudo ti Iloko Code babaen ti #LaUnionPROBINSYAnihan ken ti pannakapatanor iti Naan-andur a La Union a makatulong iti pananggun-od iti sirmata iti Probinsia tapno agbalin a Puso iti Agri-Turismo iti Amianan iti tawen 2025.

Related Photos: