Lolo, Lola iti La Union Nakikaysa iti Mini Olympics kas panangrambak iti National Senior Citizen’s Day
By: Geraldine B. Salazar-Lucero | Photos By: Rechelle Dulay and Vincent Aguinaldo, PIO | Date: August 20, 2024
Pinaneknekan dagiti nasurok 330 a senior citizens manipud iti naduma-duma nga ili iti La Union ti nabalitukan a pannarita nga “Age is just a number” kalpasan dagitoy a nakipaset iti Senior Citizen’s Mini Olympics idi maika-20 iti Agosto 2024 idiay La Union Convention Center.
Ti nasao a programa ket tinawen nga aktibidad para kadagiti senior citizens iti probinsia a binukel iti Provincial Government of La Union (PGLU) babaen iti Provincial Social Welfare and Development Office, kas paset iti selebrasion iti World Senior Citizen’s Day.
Gandat iti Mini Olympics a mangipaay iti ragsak kadagiti senior citizens ken naan-anay a maprotektaran iti salun-atda kasta pay a tapno mataginayon ti pagimbaganda kas katulungan iti probinsia iti awag iti La Union PROBINSYAnihan.
Aktibo a nakipaset dagiti lolo ken lola iti naduma-duma a paay-ayam ken pasalip. Inparangarangda dagiti talentoda iti panagsala ken laingda iti tay-ak iti ay-ayam.
Inpeksa ni Gov. Raphaelle Veronica “Rafy” Ortega-David ti suportana iti aktibo a partisipasion dagiti senior citizens iti nasao nga aktibidad. Iti panangibagi iti Executive Assistant iti gobernador a ni Justo “Tito” Orros III, pinatalgedan iti gobernador ti agtultuloy a suporta iti gobyerno probinsyal para kadagiti programa ken aktibidad a mangted iti benepisio kadagiti senior citizen iti probinsia.
Kalpasan ti Senior Citizen’s Mini Olympics, napadayawan dagiti grupo dagiti senior citizen a nangabak iti naduma-duma a paay-ayam ken pasalip.
Para iti Chess, nangabak dagiti senior citizen a nangibagi ti San Gabriel. Nangabak met iti Hulahoop Relay ken Food Relay dagiti senior citizen manipud Tubao ken San Fernando. Saan met a nagpaatiw ti representante manipud Sudipen a nangabak iti Arm Wrestling. Senior Citizen manipud Caba met iti nakaala ti titulo nga Tiktok Dance Challenge champion.
Napadayawan met nga Over-All Champion ti grupo dagiti senior citizens manipud iti Bauang; simmaruno met dagiti grupo manipud Caba ken Tubao a nakagun-od iti pwesto nga Over-all 1st ken 2nd Runner-up.
Nakipagragragsak met iti nadakamat nga aktibidad da Vice Governor Mario Eduardo C. Ortega, Bauang Sangguniang Bayan Member Tanya de Guzman, Valerie Ann Valdez a nangibagi kenni San Fernando City Mayor Dong Gualberto, ken Federation of Senior Citizens Association of La Union President Natividad Pelaez.
Ti Senior Citizen’s Mini Olympics ket pammaneknek iti pannakaiparangarang iti inklusibo a panangsuporta iti PGLU iti salun-at dagiti amin nga umili iti probinsia, kas panagyaman iti pannakikaysada iti La Union PROBINSYAnihan.
Related Photos:
